عنوان الموضوع : Sellou
مقدم من طرف منتديات الضيافة العربية

السلام عليكم


هادي احدى تحضيراتي قبل حلول الشهر الفضيل ....
سلو و لي الوصفة مغربية الاصل وحنا تعودنا عليه بحكم جدتي التلمسانية الندرومية الاصل و لي عاشت كامل حياتها في مدينة وجدة المغربية ....
الله يرحمها برحمتو وكامل موتانا المسلمين ...آمين يا رب
المقادير و الطريقة ان شاء الله :
حطي 1 كلغ فرينة تتحمص في المقلة وادا تبغي ديريه في الفرن كيما يعملو في المغرب ويدوه عند الفران ...لي هو الخباز يحمصولهم .... لانهم يعملو كميات معتبرة منو ويخبوه عولة كيما نقولو ومدة التخزين نتاعو تبقى عام كامل ....
ابقاي تحركي فيه بملعقة خشبية على نار هادية ..... وهادي المرحلة طول شوية ..... والصابر ينال ...
كي تولي الفرينة بلون بني كيما في الصورة نحيها وحطيها في سيار .... رايحا الفرينة طيح والحبيبات كيما في الصورة يبقاو حاولي بالملعقة الخشبية تمحريهم على السيار طبعا لاكانت سخونة ولابردت بيدك ماعليش ...
حطي في القصعة مع الفرينة المحمصة 1 م ص قرفة + 250 غ جلجلان محمص ومطحون ... وفي الوصفة الاصلية حاطين 500 غ جلجلان .... كيما تعرفو انو في المغرب كامل حلوتهم تحتوي على كميات هائلة من الجلجلان كيما القريوشة يعملو فيها كمية مطحونة معتبرة في وسط العجينة وللتزيين .....
المهم :زيدي حطي 300غ لوز مقلي في الزيت ومنشف ومطحون متوسط وخلي حبات للتزيين + 350سكر ناعم +100غ زريعة البسباس منقية ومطحونة ...وفي الوصفة الاصلية حاطين 125غ + مقدار من المسكة الحرة( المستكة او LA GOMME ARABIQUE ...)
1 م ك مسكة حرة مطحونة مع الجلجلان او البسباس او مكسرة بواسطة كاس باش ما تروحلكش في لاشوار ادا طحنتيها وحدها....
ورشة جوزة الطيب ....
خلطي كامل هادو المواد مليح و ديري 500 غ زبدة تدوب مع 500 غ عسل .... وبلي هاداك الخليط كامل و حركي اول شيئ بالملعقة الخشبية ....
رايحا تشوفي الخليط بدا يتجانس .... حطي كميات في علب باش ياخدو الشكل نتاعهم ادا بغيتي
او حطي DES PARTS INDIVIDUELLE في اي مول تختاريه
وفي المغرب يحطوه على شكل هرم او CONNE ويزينوه باللوز والسكر الناعم .....
وهادي الوصفة جد مغدية وتنفع بزاف في رمضان و لي مريض بفقر الدم و حتى المراة الحامل او النافس .... مليحة للاولاد ايضا



المسكة الحرة










في المغرب يحطو كميات منو في سينية السهرة مع القريوشة و البريوات نتاع اللوز معسلين و الشباكية مرفوقين بالقهوة و آتاي طبعا .....
ان شاء الله تكون عجبتكم الوصفة وان شاء الله تجربوه في هاد رمضان صدقنوني رايح ينفعكم بزاف ....
سلامي الحار ليكم
ودعوة خير تكفيني ...


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

الله يعطيك الصحة والف شكر على الشرح الله يجعلها في ميزان حسناتك يارب

__________________________________________________ __________

>>>> الرد الثاني :

شكرا نلقواها في حلويات بدون طياب
وهنا بالتفصيل شكرا

__________________________________________________ __________

>>>> الرد الثالث :

444444444444444444444444444444444 yaetik 1000 SAHA

__________________________________________________ __________

>>>> الرد الرابع :

هاااااااااااااااااااااااااايلة يا احلى فاطمة ربي يجازيك عنا كل خير يااااارب

__________________________________________________ __________

>>>> الرد الخامس :

المشاركة الأصلية كتبت بواسطة أم محمد تاج
الله يعطيك الصحة والف شكر على الشرح الله يجعلها في ميزان حسناتك يارب

بارك الله فيك