بسررررررعة طريقة صنع نستلي بالخطوات من مطبخي ماتزدوش تشروه
عنوان الموضوع : بسررررررعة طريقة صنع نستلي بالخطوات من مطبخي ماتزدوش تشروه
مقدم من طرف منتديات الضيافة العربية
من بعد ما حطيت وصفة العسل صنع منزلي اليوم حبيت نوريلكم طريقة صنع الحليب المركز المحلى كيما معروف عند الجميع باسم النستلي ههههههههه راحت على شركة نستليو الله يا اخواتي غير هو شكلا و مذاقا طبعا كيما عودتكم الطريقة بالخطوات المصورة هكدا باش نسهل على اخواتي الفهم و زيد كاين مبتدئات راهم يتعلمو ربي يوفقهم
المقادير ساهلة و متوفرة في كل بيت
-كأس حليب بودرة
-1/2 كأس سكر عادي
-3/4 كأس ماء مغلي يعني سخون بزاف
هنا هادو المقادير
خلطي الماء الساخن +السكربالمضرب اليدوي حتى يختفي تماما
زيدي الحليب و خلطي جيدا
ضعيها في الثلاجة ترتاح ليلة كاملة وفي الغد توجديه قد اصبح الحيب المركز كانه مشري استعمليه مباشرة فواش حبيتي
هنا هذا الحليب من بعد مابات ليلة في الثلاجة ....
فرغتو في بلارة زجاجية تاع مايونيز مغطاها حديد .... راكم معايا
إضغط هنا لرؤية الصورة بحجمها الطبيعي.
هنا حطيتها في الكوكوطة شوفو الماء من الحنفية واصل وين راه صبعي و إذاخفوتنشف زيدو شوية
سكرو على الكوكوطة مليح و ديرو الصفارة و شعلو النار و غير تبدأ تصفر نقصولها النار أو ديرو كيما أنا بدلتها للنار متوسطة
و خلوها حوالي 35 دقيقة إلى ساعة
ممبعد خرجت الكوكوطة تتنفس برا باش ماتصفارليش الكوزينة من البخارههههههه
ثم كي تخرج البخار نهائيا حليتها و لبست قفاز المطبخ و نحيت البلارة و حطيتها فوق صحن ولي تخاف على روحها تخاليها تبرد في الكوكوطة براحتها حذاري حذاري حذاري راهي سخونة بزاف
خليها تبرد في غرضها و هي مسكرة .. أنا رحت قيلت و كي نضت لقيتها بردت
أكرر حذاري تفتحيها وهي سخونة راهي إلهام مسكينة تحرقت كي فتحتها
كي تبرد تماما أفتحيها رايحا تلقايها على شكل فلون مكتل .... فرغيه في صحن و خلطيه بالمضرب اليدوي حتى يولي ناعم و إستعمليه عادي كيما المشري .... فقط كي تحطيه في الثلاجة راح يتماسك أكثر
هنا بدا يبرد شوفو
و هنا كي دخلتو الثلاجة و برد ملييييييييح مممممم
واش قلتوا ماشي خير ماتشروه باهض الثمن و هو مافيه والووووو
انا جامي نشريه بصح عاهدوني واحد ما يبيع بيا و يقول لشركة نسلي اني اكتشفت الخلطة السرية نتاعهم
ملاحظة :لاتنسوني اخواتي بدعوة خير لعائلتي و لوالديا و لكم بالمثل ان شاء الله
انتظر ردودكم التي تزيدني تشجيعا و الله غير تعبت و زيد ماعنديش كلافي عربي دخت و انا نكتب بصح و الله ماهي خصارة في اخواتي بنات بلادي
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
و الله غير عندك الصح النيسلي راهوغالي يعطيك الصحة نجربه و نردلك الخبر و ما تخا فيش مانبيعش عليك
__________________________________________________ __________
>>>> الرد الثاني :
بارك الله فيك يعطيك الصحة هنتينا
__________________________________________________ __________
>>>> الرد الثالث :
مشكورة اختي
__________________________________________________ __________
>>>> الرد الرابع :
يعطيك الصحة اختي على الوصفة انشاء الله نجربها
ربي يشدلك ماليك ويحفضهم اختي oum anas 69 دوك نبيع عليك لشركة نيسلي هههههههههه
ما تخفيش راني غير نتمسخر برك
__________________________________________________ __________
>>>> الرد الخامس :
انا ديما نخدمو فالمنزل و استعملتو في كيكة الالوان
الاحسن لو تحطيه فوق حمام مائي الاول باه يطيب الحليب نتاعك و يخثار و يقعدلك اكبر مدة ممكنة و من بعد حطيه في بلارة و ديريه في كوكوط
رد مع اقتباس
